![]()
H![Fedal Castro]()
oggaamiyihii Jarmalka Bari Erich Honecker iyo Fidel Castro oo 1977 kii u dhagar-maleegaaya Soomaaliya
Turjumaad: Maxamed Haaruun (mbiixi@gmail.com)
Fiiro gaar ah: (Qoraalka aan halkan ku turjumay wuxu wax ka iftiiminayaa dhacdooyin taariikheed oo Soomaalida iyo dadyawga Geeska Afrikaba ay dhibaato ka soo gaadhay. Dhibtaasi inteeda u badan, (naf iyo maalba) waxa ay ku habsatay Soomaalida, ilaa maantadan na dhacdooyinkaas raadkoodii waan la noolnahay. Arinta koleyba aniga si gooni ah ii xiiso galisay, in aan qoraalkan turjumo na I gu kaliftay, waa sida waynee ay u ka la duwanyihiin sida ay masuuliyiintii Soomaaliyeed ee waagaasu u macneeyaan dhacdooyinkaas, iyo sida dhab ahaan ay xaaladu ahayd. Tusaale ahaan, waxay tilmaamaan in wadamadii uu Soofiyeedku hormuudka u ahaa ay taageero la ma filaan ah oo military iyo dhaqaale Itoobiya u fidiyeen, taasu na ay ahayd sababtii Soomaalida loo jabiyay. Waa run taasu qayb ahaan, oo taageeradii caalamiga ahayd ee Itoobiya ay heshay natiijadii dagaalka saamayn bay ku yeelatay, laakiin qaybta aanay masuuliyiintii Soomalidu runta ka sheegin, ee qoraalkani qeexayaa waa in Soomaalida loo cadeeyay in Itoobiya la taageeraayo haddii ay arintu dagaal noqoto iyo hadii kale ba. Digniinihii la siiyay askartii Soomaalida u talinaysay, ee Siyaad Barre uu hormuudka u ahaa way fahmi waayeen, ama in ay fahmaan may doonaynin, wixii ka dhacay na warkeedii waan wada haynaa. Dhacdooyinkii dagaalkii 1977 ka horeeyay, dabeecaddii iyo hab dhaqan kii Siyaad Barre sida ay wadamadii shuuci gu u arkaayeen, iyo digniinihii Soomaalida la siiyay baa meeshan lagu sheegayaa. Akhris wanaagsan)
Qoraalkan waxa markii u horaysay la faafiyay – 6dii Ogosto, 2011.
Waa qaybo ka mid ah hadal-qoraalka kulan kii hogaamiyaha Jarmal ka Barri, Erich Honecker iyo Hogaamiyaha Kuuba, Fidel Castro. Kulan ka oo ku saabsanaa booqashadii uu Castro Itoobiya iyo Soomaaliya ku tagay, waxay masuuliyiintu cambaaraynayaan Siyaad Barre, waxayna falanqeeyeen sida loogu baahanyahay in Itoobiya iyo kacaanka ka curtayba la taageero.
Kulanka madaxdaasu wuxu dhacay: Axad, 3 April, 1977.
11:00 subaxnimo ilaa 1:30 duhurnimo, iyo isla galabtaas, 3:45 ilaa 6:00 fiidnimo.
Bar-kulan ka: Xafiiska Gudiga Golaha Dhexe, Baarliin (Berlin)
Ka qayb-galayaasha – dhinaca Jarmal ka: Jaalayaal Hermann Axen, Werner Lamberz, Paul Verner, Paul Markowski (waxa weheliyay Jaale Edgar Fries iyo Jaale Karlheinz Mobus oo turjumaayay), iyo Kuubaan ka: Carlos Rafael Rodriguez, Osmany Cienfuegos, Raul Valdez Vivo iyo Jose Abrantes.
- Jaale Erich Honecker wuxu si diiran u soo dhaweeyay Jaale Fidel Castro iyo jaalayaashii Kuubaan ka ahaa ee la socday. Aad baanu u gu faraxsanahay booqahadiina aad ku timaadeen Jamhuuriyadda Dimuquraadiga ah ee Jarmalka (GDR), iyo is dhaafsiga xogaha ku saabsan booqashadaadii aad ku tagtay wadamada Afrika iyo Carabaha qaarkood. Aniga oo ku hadlaaya afka Xafiiska Siyaasadda, waxan mar kale ku celinayaa in aanu booqashadan u aragno mid muhiim ah. Waxan ka dalbanayaa Jaale Fidel Castro in uu hadalka qaato.
(16 kii bog ee hadal-qoraalka u horeeyay meesha waa ka maqanyihiin)
-Hadalladii Jaale Fidel Castro:
……Ka hor intii aanan ka amba bixin Cadan, waxan hogaankii Jamhuuriyadda Dimuquraadiga ah ee Dadwaynaha Yemen (Yamen tii Koonfureed) ka codsanay in ay sameeyaan wax kasta oo suurtagal ah, si loo gaadho is faham dhex mara Soomaaliya iyo Itoobiya. Si wacan baa la ii gu soo dhaweeyay Soomaaliya. Waxan ka dalbaday in aan la samaynin wax isu soo baxyo dadwayne ah. Cashadii ugu horaysay ee Siyaad Barre aanu wada yeelanay, wuxu muujiyay jawi saaxiibtinimo. Ka hor safarkayga Soomaaliya, waxan ka helay warqad jawaab-celin ahayd oo daba socotay mid aan anigu horey u gu diray oo ku saabsanayd arinta xidhiidhka Itoobiya iyo Somaaliya. Sidoo kale, waxan diray wakiil Kuubaan ah si uu ula xaajoodo Madaxwayne ku xigaha Samatar (Cali-samatar) iyo Wasiirka Daakhiliga Sulaymaan (Axmed Saleebaan-dafle). Samatar wuxu matalaa kooxda Bidixda (Hantiwadaaga), Sulaymaan na wuxu matalaa garab ka Midigta (Hanti-goosiga). Hadaladii wakiilkayagu uu la yeeshay (Sulaymaan) waxa ay ahaayeen kuwo adag. Intii aanan Cadan ka taginba waxan haystay xog badan oo ku saabsan xalada Soomaaliya.
Waxa si joogto ah u soo kordhaaya awoodda iyo saamaynta ay leeyihiin kooxaha Midigta (Honti-goosi ga) ee ku dhex jira dawladda Soomaaliya. Wasiirka Daakhiliga, Sulaymaan wax kasta oo karaan kiisa ah waa uu samaynayaa si uu Soomaaliya ugu jiido dhinaca Sucuudiga iyo wadamada Isticmaari ga ah. Wax kastaa waxa ay muujinayaan in uu Samatar awoodii lumiyay, oo ay koonaha u riixeen kooxaha Midig tu. Habeenkii koobaad, waxan doonayey in ay ii kala cadaato fikradda aan ka haysto Siyaad Barre iyo kacaanka ka curtay Soomaaliya ba. Wax wadahadal siyaasadeed oo adagi cashadaas koobaad ma dhicin. Siyaad Barre ayaa iiga sheekeeyey Kacaanka Soomaaliya iyo marxaladihii uu soo maray. Maalintii xigtay na, waxan u baxnay kormeer balaadhan. Waxan booqanay mashaariic Kuuba ay dhistay, sida dugsi ga carbis ka maleeshiyooyinka, Iskuulka Beeraha iyo Iskuulka caruurta reer-guuraaga ah. In kastoo aanu saacado ku qaadanay kormeerka, hadana ilaa intaas wax wada hadal siyaasadeed oo muhiim ahi ma dhicin, galabtii na waxa la qorsheeyay isu soo bax baladhan oo dadwayne, kaas oo ka dhacaayay garoonka kubadda. Waxan garawsaday in aanay doonaynin in wax wada xaajood ahi dhaco ka hor isu soo baxa dadwaynaha. Isu soo baxu wuxu bilaabmay iyada oo aan hadal sidaas ahi noo ka la bixin aniga iyo Siyaad Barre, sidaas darted na, aad baan u taxadiraayay. Wuxu ahaa qof is-la-weyn oo aad u daran. Wuxu doonaayay malaha in uu na cabsi geliyo.
Khudbaddaydii aan isku soo baxa u jeediyey, waxa aan ku soo qaatay siyaasadda waddamada Isticmaariga ahi (Reer-galbeed ka) ay ka wadaan Gobol ka Bari ga Dhexe, door ka dib-u-socodnimada ah ee Sucuudi ga, iyo falka xoogagga kale ee dib-u-socod ka ah. Ogaan baan sidaas u sameeyay, waliba aniga oo ka war qaba awoodda way nee ay leeyihiin kuwa la haya sidii ay Soomaaliya xidhiidh dhaw u la yeelan lahayd wadamadaas dib-u-socod ka ah. Waxan ka hadlay halgan ka Urur ka Xoraynta Falastiin (PLO), Kacaan ka Itoobiya, Kacaan ka Liibiya iyo, nidaamka hore-u-socod ka ah ee Aljeeriya, ee ay doonayaan in ay go’doomiyaan. Waxan ka hadlay Muusanbiik (Mozambique), markii u gu dambaysay uun na, waxan taabtay Soomaaliya iyo sida xoogaga Isticmaariga ahi ay u doonayaan in ay dib u celiyaan nidaam ka hore-u-socod ka ah ee ka jira. Siyaad barre ayaa dadkii ka qayb qaadanaayay isu soo baxa u sheegay qofka aan ahay, laakiin hal erey oo siyaasad ku saabsan ma odhanin. Intii aanu bilaabmin isu soo baxu, waxa la soo gabagabeeyay ciyaar kubad ah oo kala badh uun maraysay. Ma hubo in ay ciyaartaasu qayb yar oo isu soo baxa ka mid ah uun ahayd, iyo in ay arintuba sidaas cakis keeda ahayd. Khudbadaydu waxay ka hor jeeday kooxaha Soomaaliya dhexdeeda ee garabka midigta (hantigoosi ga), waxay na taageraysay kooxda Garabka Bidix (Hanti-wadaagga).
Waxan dareennay in gabi ahaanba xubnihii Golaha Dhexe ay wada sacbiyeen, marka laga reebo Saleebaan (Axmed Saleebaan-dafle) iyo dadkiisa. Cali-Samatar isagu aad buu u qanacsanaa, xataa waxa muuqatay in uu Siyaad Barre qudhiisu ka helay hadalkayga. Sidaas oo ay tahay, hadana isu soo baxaas idaacadda iyo Telefishan ka toona si toos ah loo ga ma baahinin. Fiidnimadii maalintaas uun baanu bilawnay in aanu guriga aan daganaa ka ga hadalno arimo xadidan oo siyaasadda ku saabsan. Waxa ii caddayd in uu Saleebaan-dafle guriga aan dagganaa ku rakibay qalabka wax lagu dhagaysto, sidaas darteedna aad baan u taxadirayey. Aakhirkii fiidnimadaas ayuu Siyaad Barre bilaabay in uu ka hadlo Itoobiya. Wuxu kala mid dhigay boqortooyadii Ruushka (Tsarist Empire), waxaanu sheegay in ay Itoobiya tahay gumaysiga kaliya ee haatan jira. Boqortooyadii Ruush ku waxay meesha kaga baxday xikmaddii Lenin, laakiin Itoobiya ayay qudheedi ka dhisantahay – ayuu yidhi. Waxa jirtay wakhti hore in uu Siyaad Barre Itoobiyaan ka u soo jeediyay in ay labadooda wadan fadaraali ama xataa midnimo wada galaan, oo aanay iyaku na ka jawaabin, laakiin imika Itoobiyaan ka ayaa ba xalka qudhiisii wada. Si aad u xamaasadaysan buu u ga hadlay dadaaladiisa ku saabsan xal uu Itoobiyaan ka la gaadho. Aniga oo fursadda ka faaiidaysanaaya, waxan u sheegay in aan maalinta barito ah u safraayo dhinaca Itoobiya, waxaanan waydiiyay in uu diyaar u yahay kulan uu Mingisto la yeesho, waanu aqbalay.
Maalinti xigtayba waxa aan u duullay Itoobiya, horeyna waxan isu la qaadannay in aan soo dhawayn ballaadhan la ii samaynin. Xilligaas waxa ay ku jireen oo socday dagaalkii sokeeyaha, xabadaha dhawaaqoodana waa la maqlaayey. Markii aan gaadhayba Mingisto waxa uu ii kexeeyey qasrigii qaddiimka ahaa ee Boqortooyada, wada hadalkayaguna durbadiiba wuu bilaabmay. Waxa ii caddaaday xogihii aan hore u haystay. Maalintii xigtayna waannu sii wadnay wada xaajoodkii. Taxadir dheeraad ah oo dhinaca amniga ah in aan qaadannay lama filaan may ahayn, sidaas darted Itoobiyaanku waxa ay keeneen koox ciidammadooda ah, anigana waxa ila socday askar Kuubaan ah. Maalintii aan imid waxa la isla dhex marayey warar sheegaaya af-gambi, laakiin waxba ma dhicin. Waxa sii xoogoobay dareen kayga ah in kacaan dhab ahi uu waddankan ka curanaayo. Waddankan boqortooyada dhul-goosiga ah soo ahaan jiray, haatan dhulkii ayaa loo qaybinayaa beero-falatada saboolka ah. Halkii beerwaleba waxa la siinayay 10 higtar . Magaalooyinka qudhooda waxa ka socoday dib-u-habayn. Waxa la soo rogay in muwaadinkiiba uu hal guri uun yeelan karo. Dhulal baa loo banneeyey si guryo cusub looga dhiso. Sida oo kale, waxa jira dhaqdhaqaaq ballaadhan oo xoog leh. Magaalada caasimadda ah dhexdeeda, waxa suurowda in si lama filaan ah nus malyan qof dad gaadhaaya lagu abaabuli karo. Waftigii bishii Febraayo aanu dirnay, kadib markii ay soo qiimeeyeen qaybaha ka la duwan ee ciidamada qalabka sida, waxa ay go’aamiyeen in laba mooyee boqolaalka Janaraal ee ciidanka lawada caydhiyo.
Saraakiisha ciidamada, iyo saraakiil-xigeen shaqada ka fadhiyay ayaa haatan wadanka caynaanka u haya. Hogaanka wadan ku waxa ay ka fikirayeen sidii ay xisbi u samayn lahaayeen. Meeshaas waxa ka jira halgan daran oo u dhexeeya dabaqadaha danyaar ta ah, iyo dhiigmiiratada (dhul-goosi ga) wadanka. Koox yar oo ah dabaqadda burjuwaasiyiinta ayaa doonaaya in ay kacaanka dadka ka hor keenaan. Jabhad gooni u goosi ah oo xoogan baa dhinaca Ereteriya ka jirta. Halis muuqata ayaa dhinaca Suudaan ka ga furan, halka Soomaaliya na ay sheeganayso ka la badh dhulka Itoobiya ka mid ah. Muddo ku siman ilaa shan boqol oo sano, ayaa gobol kaas ay ka jireen dagaalo ku salaysan dhulka. Mingisto wuxu I ga ga yaabiyay in uu yahay nin degen, daacad ah, oo aan dheeldheelaynin, aaminsan na quwadda dadwaynaha. Waa shakhsiyad garaad badan, xikmadiisa na wuxu muujiyay saddex dii Febraayo. Kooxaha Midig ta (Hanti-goosi ga) ayaa qorsheeyay in ay ka takhalusaan kooxda Bidix da (Hanti-wadaagga). Qorshahan waxa bilaw u ahaa khudbad xooggan oo Madaxwaynuhu (Tafari Bantay) uu jeediyay, oo uu ka ga hadlay wadaniyadda. Mingisto wuxu ka ga hor tagay afgambi gaas, isaga oo isugu yeedhay shir ay ku kulmaan golihii kacaanku, kaas oo dhacay saacad ka hor xiligii loo qorsheeyay. Kulanka dhexdiisii, Mingisto wuxu xidhxidhay kooxihii Midig ta, waanu wada toogtay.
Maalintaas (3dii Febraayo, 1977) Itoobiya waxa ka hirgalay go’aan leh saamayn xoogan. Khariiraddii siyaasadda ee wadan ka ayaa is bedeshay, waxaana la qaaday talaabooyin aan suurtagal ahayn ka hor 3dii Febraayo. Awal hore kooxaha Bidix da (Hanti-goosiga) si dadban uun baan u taageeri karaynay, laakiin hadda si toos ah, oo aan wax xanibaad ah lahayn baan u saacidi karnaa. Mingisto waxan waydiiyay in uu diyaar u yahay in uu magaalada Cadan Siyaad Barre ku la kulmo iyo in kale, waanan isla ogolaanay. Markii wada xaajoodku noo dhamaaday ba, waxan u duulay dhanka Cadan. Subaxnimadii ba Siyaad Barre wuu soo gaadhay Cadan. Mingisto ma imaanin ilaa galabnimadii dambe. Waxan la sheekaystay Siyaad Barre, waxaanu la baxay cidiyahiisa. Wuxu I gu yidhi – hadii uu Mingisto yahay Kacaanyahan dhab ah, waa in u sameeyaa sidii Lenin oo kale, ka na baxaa dhulkayga. Mawqif aad u adag buu istaagay. Waxan ku idhi – ma waxad dareensantahay in aanu Itoobiya kacaan dhab ahi ka curanin, isla markaana Mingisto aanu ahayn hogaamiye hanti-wadaag ah oo dhab ah? Wuxu I gu yidhi – haa, Itoobiya wax Kacaan ahi ka ma curanin. Markii aan Muqdisho la joogay, Siyaad Barre waxa uu I tusay khariirad muujinaysa dhulka Soomaali-wayn, oo ay ku jirto nus dhulka Itoobiya ka mid ahi. Ka dib hadaladii aan Siyaad Barre la yeeshay, waxan la kulmay Mingisto, waxaanan u ga waramay hab-dhaqan ka Siyaad Barre, aniga oo ka codsaday in uu degenaan muujiyo.
Dhab ahaan waan ka xumaaday in aan Mingisto Cadan ku marti qaaday, xili amuuro qaydhini ay ka jiraan wadankiisa, iyo xaaladaha sidaas u murugsan, in uu dhagaysto doodda Soomaaliya ee dhul doon ka ah. Waxan la soo qaaday xaaladda ciidamada Itoobiya, waxaanu ii sheegay, in kasta oo ay dhibatooyin iska jiraan, hadana in ayna u muuqanin halis inqilaab oo taagani. Siyaad Barre ayaa durbadiiba hadalka qaatay kolkii uu shir ku furmay. Siyaad Barre waa Janan (General) wax bartay xiligii isticmaarka. Kacaanka Soomaaliya waxa hogaamiyaa waa jananno (generals) awood badan yeeshay xiliyadii gumaysiga. Anigu fikradda aan Siyaad Barre ka qaatay markaas ba way ii cadayd. Wax kale ma aha ee waa uun qof ‘qab-bilaash’ ahi ka dhaadhacsanyahay. Qab-bilaashnimadu waa xaqiiqada ugu muhiimsan ee Siyaad Barre. Hanti-wadaagnimadu waa qolof sare oo uu u ga jeedo uun in uu dadka ku soo jiito. Wadamada Hanti-wadaagga ah ayaa hub ku taageeray, isagu na hanti-wadaagnimada mabdd’a ahaan u ma haysto, dadwaynaha uun buu ku maaweeliyaa. Xisbiguna waxa kaliya ee uu u jiraa waa in uu awoodiisa shakhsi ga ah ku ilaashado. Xukunka Siyaad Barre marka la eego, waxa isku jira is-dhalyo aan dabiici ahayn oo ka timid isku darka niman askar ah oo soo maray iskuuladii gumaystaha, iyo is muujin hanti-wadaagnimo. Isku soo wada duuboo, Siyaad Barre wax ka mid ah Hanti-wadaagnimada ayaa soo jiitay, waxase wadanka si wayn uga jira kala sed-roonaan iyo cadaalad darro. Guud ahaan na, fikradaha dhabta ah ee Siyaad Barre waxay ku qotomaan waa wadaniyad iyo qab-bilaash ah, ma aha Hanti-wadaag.
Hadaf kiisu waxa uu yahay waa uun Siyaasad duugowday: saaxiibtinimo iyo ereyo macaan. Siyaad Barre wuxu u hadlaa sida nin xikmaawi ah oo kale; kaliya wuu hadlaa uun. Hogaamiyayaal siyaasadeed oo badan, oo aan aqaano aad buu uga duwanyahay. Hogaamiyayaasha Masar (Anwar Sadat), Aljeeriya (Houari Boumedienne), Mozambique (Samora Machel), Angola (Agostinho Neto) iyo kuwo kale oo badani ba waa shakhsiyado adag. Sidaas oo ay tahay, hadana way ku dhagaysan karaan, ma na aha kuwo qandhadh ah oo mar kasta isla quman. Dhamaantood waa kuwo lala hadli karo. Siyaad Barre wuxu isu qabaa in uu gaadhay figtii ama heerkii u gu sareeyay ee xikmadda. Ilaa iyo imika arimuhu si toosan bay u gu socdaan. Talyaani ga iyo Ingiriis ka ayaa janan (General) ka dhigay. Kacaankii isla daqiiqaddii ba wuu hirgalay, iyada oo aan xataa hal xabadna la ridin. Waji Hanti-wadaag buu soo gashaday, caawimo dhaqaale iyo hub na Soofiyeed ka (Soviet Union) ayuu ka helay. Wadankiisu waa mid muhiimad saraysa leh, isaguna wuxu jecelyahay mudnaanta. Barre aad buu isu gu khushuucsanyahay. Hadalkiisa ku saabsan Hanti-wadaaggu ma aha mid la xamili karo. Waa hanti-wadaag ga ugu wayn; toban erey ma odhan karo isaga oo aan hanti-wadaagnimada soo qaadin.
Qaab-hadal kiisa noocaas ah ayuu shirka dhexdiisii Mingisto ku la hadlay. Wuxu bilaabay in uu bixiyo cashar ku saabsan Itoobiya, Mingisto na ka dalbaday in uu yeelo tabtii uu Lenin sameeyay oo kale – ka takhalus Boqortooyada Itoobiyaanka – buu yidhi. Mingisto daganan buu muujiyay, waxaanu yidhi: anaku xal waanu doonaynaa, diyaar na waanu u nahay, waxaana loo baahanyahay in talaabooyin kii u gu horeeyay oo muuqda la qaado si labada dhinac ay is faham u gaadhaan. Siyaad Barre si jeesjees ah buu hadalkaas ka ga jawaab-celiyay, waxaanu sheegay in uu ka niyad jabay Mingisto, hogaanka kacaanka Itoobiya na ay la yimaadeen caqliyaddii Xayle Salaase oo kale uun. Kulan ku wuxu soo bilaabmay 11 kii habeenimo, wax xal ahi na ma soo muuqanin haba yaraatee. Halkaas markii la maraayay, ayuu Mr Carlos Rafael Rodriguez (Madaxwayne ku Xigihii Kuuba) soo jeediyay talo ah in la sameeyo gudi joogto ah, oo xal raadisa, xubno na ay ka yihiin wakiilo ka socda Itoobiya, Soomaaliya iyo Jamhuuriyadii Dadwaynaha ee Yemen. Anaku na (Kuuba) in aanu gudigaas joogtada ah ka mid noqono waxa na gu khasbay gabi ahaan ba qaybihii ka la duwanaa ee shirka ka soo qayb galay. Siyaad Barre wuxu sii waday in uu jilo door kiisii ahaa nin wayn oo xikmad leh, ah na hantiwadaaga u gu wayn iyo, shuuci ga u gu wayn. Isla goobtii, wuxu u hadlay si af-miishaarnimo ah, isaga oo sheegay in waftiga Soomaalidu ay yihin koox talo wadaag ah, kalsooni na ka haysta xafiiska siyaasadda, ayna tahay in uu tashi ku la noqdo marba hadii uu yahay uun qof kaliya oo ka mid ah kooxda.
Nasasho gaaban oo waftigiisa uu gooni u gu soo arkay ka dib na, wuxu soo jeediyay wada hadal fool-ka-fool ah oo ay isaga iyo Mingisto wada yeeshaan. Mingisto oo hadaladii hore ee Siyaad Barre awgeed dareemay meel-ka-dhac iyo kalsooni darro, wuxu sheegay in uu kulan ka noocaas ah ogolyahay, laakiin hadda aanu diyaar u ahayn. Waa in la isla meel dhigo arintii gudiga joogtada ah. Iyada oo kulankii sii socdo, saacaddu na 3:15 habeenimo ay marayso, ayuu Siyaad Barre keenay qoraal uu soo diyaariyay, kaas oo uu ku ogolaaday dhismihii gudiga joogtada ah, laakiin shaqadeeda koobaad uu ka dhigay in ay noqoto xalinta arinta xuduudaha. Taasu waxay ka dhignayd, in shaqada gudigu ay bilawga ba ku dhaqaaqdo arinta dhulka. Maxaa la filan karaa in ay Itoobiya ka ga jawaab-celiso qaabkaas daandaansi ga ah. Intii la gu jiray nasashada, waxan la hadlay Mingisto, ma nuu qarsanin sida uu Siyaad Barre u diidanyahay. Sidoo kale, waxan la kulmay Siyaad Barre, waxaanan waydiiyay in uu dhab ahaan doonaayo in xal la gaadho iyo in kale. Wuxu I gu yidhi – su’aashaas waa in uu Mingisto ka jawaabo. Wuxu sii waday qaab-hadal kiisii kacaanyahanimada ahaa, isaga oo yidhi – qof ay dhab ka tahay hanti-wadaagnimada, kacaanyahanimada iyo shuucinimadu ma aha in uu indhaha ka qarsado waaqica hortiisa yaala. Wuxu yidhi – dhab ahaan Mingisto waa nin adag, talaabooyin adag na wuu qaaday, maxay tahay sababta uu sidaas oo kale go’aan adag oo sax ah u gu qaadan waayay goobtan iyo goortan aynu joogno, ee uu u xalin waayay xaajada meesha taala?
Jawiga noocaas ah, waxa I la soo gudboonaatay xaalad adag, oo ay tahay in aan laba uun midkood yeelo – in aan iska aamuso, iyo in aan ka hadlo sida aan u arko mawqif ka Siyaad Barre. Sidaas darted, waxan go’aansaday in aan badheedho sababaha soo socda awgood:
1. In aan afka xidho waxay ka dhignaan lahayd, taageero aan u muujinaayo siyaasadaha Soomaaliya ee ku dhisan qabka bilaashka ah, iyo wixii natiijooyin ah ee ka dhalan karaba. Sidoo kale, aamus kaasu wuxu taageero u noqon lahaa kooxaha dib-u-socod ka ah ee Soomaaliya dhexdeeda.
2. In aanan Siyaad Barre u jawaabin waxay ka dhignaan lahayd, in wax kasta oo hadda ka dib ay wadamada hanti-wadaagga ahi ku caawiyaan Itoobiya, si kasta oo taageeradaasu u yartahayba, in uu Siyaad Barre ku tilmaamo khiyaamo dhabar-jabin ah.
3. Duruufta noocaas oo kale ahi, Jamhuuriyadda Yaman xaalad caynkee ah bay galin lahayd hadii ay Itoobiya ku taageeraan taangiyo, gaadiid iyo madaafiic, oo lagu daabulo maraakiibta Soofiyeed ka?
Intaas waxa dheeraa, in aanu Siyaad Barre ku gaabsanin meel-ka-dhacyada uun, wuxu se isku dayay mar dhexe in uu fariin hanjabaad ah gudbiyo, waxaanu yidhi – qof na ma sheegi karo arimahan oo dhami waxa ay inna gayeysiin karaan. Sababahaas awgood baan u dhiibtay badheedhahayga. Waxan sharaxay in aanu Siyaad Barre aaminsanayn in Itoobiya uu kacaan dhab ahi ka curtay, iyo dhacdooyinkii 3dii Febraayo in ay dareenka noocaas ah jawaab-celin u yihiin, iyo in uu Mingisto kacaanyahan dhab ah yahay. Waan sii waday hadalka aniga oo idhi – anaku waxan qabnaa in waxa Itoobiya haatan ka socdaa uu yahay kacaan dhab ah, in dhacdadii 3dii Febraayo ay ahayd marxaladii is bedelka, iyo in Mingisto uu yahay hogaamiye kacaanyahan ah, oo ku hawlan is bedel baaxad leh. Waxan si qayaxan u cadeeyay, in ayna suurtagal ahayn in aanu mawqif ka Siyaad Barre si na ba u ayidno. Waxan sheegay in mawqif ka Siyaad Barre uu halis ku yahay kacaan ka Soomaaliya, Itoobiya midka ka curtayna halis galiyay, isla markaana uu Jamhuuriyadda Yaman xaalad qalafsan galin doono. Sidoo kale, waxan carabka ku adkeeyey in mawqif ka Siyaad Barre uu u faa’iidaynayo kooxaha Soomaaliya dhexdeeda ee dib-u-socod ka ah, iyo dadaal kooda ay kaga hor jeedaan hanti-wadaagga, Soomaaliya na u gu jiidayaan dhinaca Sucuudiga, iyo isticmaarka caalamiga ah. Waxan tilmaamay in mawqif ka noocan oo kale ahi uu xumaynaayo xidhiidhka ay Soomaaliya la leedahay wadamada hanti-wadaagga ah, aakhirkana uu keenayo kacaanka Soomaaliya oo fashilma.
Aniga oo doonaaya in aan dareensiiyo masuuliyaddooda taariikhi ga ah, waxan u gacan-haadiyay Siyaad Barre iyo waftiga Soomaalida ah dhamaantood. Waxan idhi – ma u malaynayo in arimahani ay dagaal Itoobiya iyo Soomaaliya dhex mara sababi karaan, , laakiin waan warwarsanahay marba hadii aan ogahay halista dagaalku leeyahay. Ma rumaysni in ay jiraan dad sabab u noqon kara in ay umaduhu dagaalamaan. Ka dib markii aan sidaas cadaan ka ah u hadlay, Siyaad Barre ayaa kolkiiba hadalkii u baxay, in aanu abidkiis dagaal doonin na wuu sheegay. Kacaanyahan ahaan iyo hanti-wadaag ahaan jidkaas anigu ma doorteen, haddiise wadamada hanti-wadaagga ahi ay Soomaaliya ka goosanayaan, waa arin iyaka u taala – ayuu yidhi. Hadda waxan door bidi lahaa, in aan cadaadis badan uun Siyaad Barre saaro, laakiin Mingisto kulan kaas ma ku soo marti qaadeen. Halkaas kolkii ay maraysay, waxan sheegay in aan ayidsanahay kulan madaxeedkan (Mingisto iyo Siyaad) ay isugu yimaadeen, laakiin waxba ma ka odhanin hadaladii meel-ka-dhaca ahaa ee Siyaad Barre uu Mingisto ku yidhi. Waxan sheegay in Kuuba ayna doonaynin in xidhiidhka ay ka goosato kacaanka Soomaaliya, taas badalkeedana, aanu taageernayba. Shirkiina gabi ahaanba wuxu ku soo dhamaaday natiijo la’aan.
Immika haddii aynu taageerno Itoobiya, Siyaad Barre xaq u ma laha in uu khiyaamo innagu eedeeyo. Si cad baan ugu sheegay in Itoobiya uu ka socdo kacaan dhab ahi, sidaas dartedna, loo baahanyahay in aannu taageerno. Si kastaba, waxan dareemay in uu Siyaad Barre tabashooyinka sheeganaayo dhinaca Soofiyeedka. Wuxu ka cadhaysnaa shidaal ay ugu ballan qaadeen marar badan oo ka soo daahay, iyo in aanay u soo dirin qalab dayactir iyo cagafcagafyo ay ka sugaayeen. Ambaasatoorkii Soofiyeed ka oo shirka joogay ayaa arintaas tafsiir ka bixiyay, wuxuuna sheegay in sababtu ay tahay Soomaalida oo marar badan waxa ay doonayaan wax ka badalay, taasina ay dib u dhac weyn keentay. Intaas wuxu raaciyay, in nasiib darro ay dhacday, oo markabkii shidaalka Soomaaliya u soo sidday uu dhexda ku degay. Markii aan siyaad Barre warkaas u sheegay, wuxu iigu jawaabay in Soofiyeedku ay beenaalayaal yihiin. Wuxu sheegay in qaladku aanu ka soconnin dhinaca Xafiiska Siyaasadda ee Soofiyeedka, laakiin ay kharbudaad wadaan qaar dhinaca hoose ee maamulka joogaa. Sidaa oo kale, cadhada iyo cambaaraynta Siyaad Barre ee Soofiyeedku marar kalena way soo baxday. Wuxu sheegay in wadankiisa ay biyo yaraani ka jirto, xoolaha, gaar ahaan l’o du ay dhimanayso,. Xiligii muusku bislaan lahaa na ay dib u dahcday. Wuxu sheegay in waxaas oo dhan na sababtoodu ay tahay, mishiinadii biyaha soo saaraayay ee Soofiyeed ku ay bixiyeen oo shaqayn waayay.
Marka la eego hab-dhaqan kaas Siyaad Barre, waxa ii muuqata halis wayn. Sidaas darted, ayaan si qayaxan kuu gu sheegay wixii ay ila tahay, oo runna ah, aniga oo aan wax ba maldihin. Waxan jecelahay in aan aragtidayda si daacad ah kuu la wadaago. Wadamada hanti-wadaagga ah dhibaato ayaa haysata. Haddii la taageero Itoobiya, waxan luminaynaa saaxiibtinimada Siyaad Barre. Haddii aan Itoobiya taageeri weyn na, kacaanka halkaas ka curtay wuu fashilmayaa. Taas weeyaan arrinta ugu muhiimsan ee meesha taallaa. Waxa jirtay codsiyo dhawr ah oo ku saabsan caawimo milatari – Hogaamiyaha Liibiya (Qadaafi), Mingisto iyo madaxda Koongo ayay na ka yimaadeen. Intii aanu Afrika joognay, waxan Moosko u soo dirnay Mr Carlos Rafael Rodriguez (Madaxwayne ku xigaha Kuuba) si uu ula soo xaajoodo jaallayaashayada Soofiyeedka, iyo dhinaca Hafaana si uu u la soo tashado hogaanka Kuuba intooda kale. Si aynu u helno xal ka ugu wacan, waa in aan arrintan si gun dheer oo daggen uga fikirno, maankana ku hayno xaaladda guud ahaaneed ee waddammada hanti-wadaagga ah. Intaas oo dhanse waxa ka mudani waa in aan Mingisto wax u qabanno. Annaku haddadanba waxan wadnaa qorshe aan Itoobiya ugu daabulayno hub bakhaaradayada iska yaallay, gaar ahaan hubka fudud ee gacanta oo ay sameeyeen Faransiis ka, Jeegga iyo Biljam ku. Waxa loo baahanyahay in la hubeeyo maleesiyooyin tiradoodu gaadhayso 45000. Hadda waxan diraynaa khubaro military oo maleesiyadaas ku carbiya isticmaalka hubka. Itoobiya waxa jooga dad badan oo ciidanimada ku haboon. Waa in aan carbino ciidamadaas.
Geesta kale, dhinaca Ereteriya waxa ka jira xaalad qalafsan. Dhaqdhaqaaqa xoraynta laftooda qaarbaa horusocod ah, laakiin waxa ay ciyaarayaan door dib-u-socodnimo. Jabhadahaas Ereteriya ee gooni-u-goosiga ah waxa taageera wadamada Suudaan, Sucuudiga iyo Masar. Ciidan fiican oo dhaqan ciidanba Itoobiya waa leedahay, waxa ayse u baahanyihiin wakhti ay ciidamadooda ku diyaariyaan. Mingisto wuxu na weydiistay macallimiin illaa 100 gaadhaaya, oo maleesiyooyin ka u carbiya, haddase wuxu na waydiiyay illaa 150 khubaro ah oo ka caawiya sidii ay qaybaha ka la duwan ee ciidamada rigli ga ah u dhisi lahaayeen. Hadadan ba waxa halkaas na ga jooga khubaro la taliyayaal ah. Itoobiya way leedahay dad iyo duunyo ku filan si ay ciidan u dhisato. Maalmahan dambe waxa jiray warar la isla dhex maraayay oo sheegaaya in xoogaga dib-u-socod ka ahi ay laba bilood gudahood Asmara gacanta ku dhigayaan. Kacaanka Itoobiya ka jiraa se waa mid muhiimad aad u wayn leh.
Dhamad…
M Haaruun – mbiixi@gmail.com
