Fowsiya: Al-Shabaab waxay geysataa xad-gudubyada ugu daran ee ka dhanka ah xuquuqda bini’aadamka

Awdalpress(Muqdisho) 27 Nov, 13–Wasiirka arrimaha dibadda ee Soomaaliya, ahna raysul wasaare ku xigeenka dalka, Fowsiya Yuusuf Xaaji Aadan ayaa ku eedeysay kooxda Al-Shabaab inay geysato gabood-fallada ugu daran ee ka dhanka xuquuqda bini’aadamka Soomaaliya.

Iyadoo ka hadlaysay shir ku saabsan horumarinta Midowga Yurub iyo taageeridda dowladaha kaalmada u baahan oo ka socda magaalada Brussels ee dalka Belguim, Fowsiya ayaa sheegtay in loo baahan yahay in loo midoobo sidii loo burburin lahaa kooxda Al-Shabaab.

“Rabshadaha ay kooxda waddo, dhaqankeeda ku aaddan haweenka iyo dadka laga tirada badan yahay, is-hor-taagga gargaarka bini’aadannimada iyo xiritaanka iskuullada iyo xarumaha caafimaadka ee ku yaalla goobaha ay ka taliso ayaa caddayn u ah in loo baahan yahay in go’aan midaysan oo caalami ah laga gaaro sidii looga adkaan lahaa kooxda Al-Shabaab,” ayay tiri Fowsiya Yuusuf.

Waxay sheegtay in xukuumadda ay ka tirsan tahay ay xoogga saareyso sidii loo horumarin lahaa xaaladda xuquuqda bini’aadamka ee Soomaaliya.

RBK